Գրպանին խփող պատիժ

ԱԺ նախագահ Հովիկ Աբրահամյանը Facebook-ի իր էջում տեղեկացրել է, որ խորհրդարանի աշխատանքներից անհարգելի բացակայած պատգամավորների աշխատավարձերից պահումներ են արվելու:

Հովիկ Աբրահամյանը նշել է, որ ինքը բազմիցս` թե' Ազգային ժողովի լիագումար նիստերի, թե' բազմաբնույթ խորհրդակցությունների ժամանակ բարձրաձայնել է այդ մասին:

«Կարծում եմ, որ հաշվի առնելով այն հանգամանքը, որ գործող խորհրդարանը պրոֆեսիոնալ է` յուրաքանչյուր պատգամավոր պետք է գիտակցի, որ ժողովրդի կողմից ընտրվել է օրենսդիր աշխատանք իրականացնելու համար, և վերջինս հանդիսանում է նրա հիմնական աշխատանքը: Իհարկե, չեմ բացառում, որ բացակայությունները ունենան հարգելի պատճառ, և այս առումով պատգամավորների բացակայությունները, «Ազգային ժողովի կանոնակարգ» ՀՀ օրենքով սահմանված կարգով, կարող են ճանաչվել հարգելի»,- ասված է ԱԺ նախագահի էջում:

Անդրադառնալով անհարգելի բացակայություններին` Հովիկ Աբրահամյանը նշել է, որ ինքը խիստ բացասական է գնահատում դրանք: «Արդեն իսկ հանձնարարել եմ, որպեսզի այն պատգամավորների աշխատավարձից, որոնք անհարգելի բացակայել են, յուրաքանչյուր օրվա համար կատարվեն պահումներ»,- գրել է նա: