Վրաստանի խորհրդարանի "հայ" պատգամավորը

Վրաստանի խորհրդարանում ներկայումս երեք հայ պատգամավոր կա:

Նրանցից մեկի` Արմեն Բայանդուրյանի հետ զրույցում «Երկիր»-ի թղթակիցը հետաքրքրվեց, թե Վրաստանի խորհրդարանում ո՞րն է եղել նրա վերջին նախաձեռությունը, որն անմիջապես վերաբերել է հայկական համայնքին:

Պատգամավորը պատմեց, որ իր նախաձեռնությամբ վերջերս ընդունվել է Վրաստանի բարձրագույն կրթության մասին օրենքում փոփոխություններ կատարելու նախագիծը: Ըստ այդ փոփոխության` Վրաստանում ազգային փոքրամասնությունների ներկայացուցիչները բուհ ընդունվելիս կարող են քննություն հանձնել իրենց մայրենի լեզվով, սակայն մեկ տարվա ընթացքում, կառավարության ֆինանսավորմամբ, տվյալ ուսանողը պետք է վրացերեն սովորի:

Ընդ որում` Ա. Բայանդուրյանը հատուկ նշեց. «Ես որպես հայ չէ, որ ներկայանում եմ խորհրդարանում, այլ որպես Վրաստանի խորհրդարանի պատգամավոր»:

Ի դեպ, Վրաստանի հայկական համայնքում մեր հարցումները ցույց տվեցին, որ վերոհիշյալ օրենքի ընդունման նախաձեռնողը ոչ թե խորհրդարանի համապատասխան հանձնաժողովը կամ հայ պատգամավորներն են, այլ Վրաստանի նախագահը: