"Հայոց Ցեղասպանությունը 1914-18 թվականների վրացական պարբերականներում" գրքի շնորհանդեսը

Վրաստանի Ազգային Խորհրդարանական գրադարանում 2011 թվականի ապրիլի 20-ին կայացավ «Հայոց Ցեղասպանությունը 1914-18 թվականների վրացական պարբերականներում» գրքի շնորհանդեսը: Գրքի ստեղծման գաղափարը և ժողովածուի հրատարակման հետ կապված բոլոր աշխատանքները իրականացրել են Վրաստանի Հայ Համայնք և  Վրաստանի Հայ ուսանողների միություն հասարակական կազմակերպությունները: Այն լույս է տեսնում Եվրոպայի Հայ Դատի հանձնախմբի (EAFJD) Վրաստանի գրասենյակի և Վրաստանի Հայ Համայնքի հովանու ներքո:

«Հայոց Ցեղասպանությունը 1914-18 թվականների վրացական պարբերականներում» ժողովածուում տեղ են գտել Վրաստանի Ազգային Խորհրդարանական գրադարանի` վրացական պարբերականների բաժնում պահպանվող Հայոց Ցեղասպանության թեման լուսաբանող նյութեր:  Վրացերեն լեզվով այս ժողովածուում ներկայացված են Հայոց Ցեղասպանության թեման լուսաբանող նյութեր վրացական երեք` «Սաքարթվելո» («Վրաստան»), «Սամշոբլո» («Հայրենիք»), «Սախալխո փուրցելի» («Ժողովրդական թերթոն») թերթերից և «Կլդե» («Ժայռ») ամսագրից:

«Գրքի հիմնական նպատակներից է խթանել Վրաստանի գիտական շրջանակներին` ուսումնասիրել նյութերի ու փաստերի այն մեծ պաշարը, որոնք պահպանվում են վրացական արխիվներում, դրանով լրացնելով Հայոց Ցեղասպանության արդեն հայտնի պատկերը»,- ասաց գրքի նախաձեռնողներից Ալեքսանդր Օհանյանը:

Վրաստանի Հայ ուսանողների միության նախագահ Արմեն Աղաջանովի խոսքով էլ, «Հայոց Ցեղասպանությունը 1914-18 թվականների վրացական պարբերականներում» գիրքը նպատակ ունի նաև վրացի ընթերցողին ծանոթացնել Հայոց Ցեղասպանության փաստի հետ, քանի որ այս հարցը  վրաց հասարակությունում տասնամյակներ շարունակ «տաբու» է համարվել:

Գրքի առաջաբանը գրել է պատմական գիտությունների դոկտոր, պրոֆեսոր Օթար Ջանելիձեն, ով նշում է, թե այս ժողովածուում տեղ գտած նյութերը արտահայտում են այն ժամանակվա վրացական մամուլի և քաղաքական կազմակերպությունների տեսակետը Հայոց Ցեղասպանության մասին և ցույց են տալիս վրաց ժողովրդի վերաբերմունքը Թուրքիայում հայերի հանդեպ իրականացված ողբերգության շուրջ:

Նշենք, որ գիրքը հեղինակել են Վրաստանի Հայ ուսանողների միության անդամներ Ալեքսանդր Օհանյանը, Արթուր Միրզոյանը, Ռազմիկ Բադալյանը, Գևորգ Յագուտովը և Էդուարդ Սահակյանը, ովքեր մեկ տարի շարունակ գրադարանում ուսումնասիրել, հետո էլ` մշակել և պատրաստել են ժողովածուն: