Գովեցին Սամվել Կարապետյանի նախաձեռնությունը

Այսօր ԱԺ պատգամավորներ  Տաճատ Վարդապետյանը եւ Հակոբ Հակոբյանը ասուլիսային առիթը բաց չթողեցին «Տաշիր 2010» մրցանակաբաշխության ժամանակ Սամվել Կարապետյանի` բնակարանների նվիրատվությունը գովերգելու համար:

Տաճատ Վարդապետյանը նույնիսկ Ջիվանի հիշեց` «Խելքի աշեցեք». ուղղված էր բոլոր նրանց, ովքեր քննադատել էին «բարեգործությունը». չէ՞ որ նման քննադատությունները հիասթափեցնում են բարեգործներին:

Այնինչ, ըստ Տ. Վարդապետյանի, սա նոր տաղանդներ գտնելու լավագույն տարբերակն է եւ պետք է վարակիչ օրինակ լինի մյուսների համար:

Տ. Վարդապետյանը նույնիսկ դժգոհեց, որ նույն խստությամբ մամուլը չի խոսում «ազգային բյուջեն թալանողների» մասին, իսկ այն հարցին, թե ովքե՞ր են թալանչիները, պատգամավորը խուսափողական պատասխան տվեց:

Հակոբ Հակոբյանին այս թեման բավականին վրդովեցրեց: Նրա կարծիքով` Ս. Կարապետյանի իրավունքն էր նվերներ տալ կամ չտալը: Ըստ նրա` հասարակության որոշ շերտեր քննադատեցին այդ քայլը, քանի որ իրենց ավելի արժանի էին համարում` բնակարանը ստանալու համար:

Իհարկե, կա սոցիալական խնդիր, սակայն, Հ. Հակոբյանի խոսքերով, այդ հոգսերը լուծելը Սամվել Կարապետյանի խնդիրը չէ: Եվ ինչ էլ անում է, պետք է գոհանալ: Հ. Հակոբյանը հիշեց, թե մի ժամանակ գնահատվում էր Լոս Անջելեսից ծամոն բերողների գործը, իսկ հիմա մարդը Հայաստան բնակարաններ է բերում: