ՀԱՄԱՍ-ը դադարեցնում է կրակը

Պաղեստինյան ՀԱՄԱՍ շարժման ղեկավարությունն այսօր հրամայել է Գազայի հատվածում գործող բոլոր գրոհայիններին` դադարեցնել իսրայելական տարածքների հրետակոծումը. տեղեկացնում է «Ջերուսալեմ պոստը»:

Երեկ ՀԱՄԱՍ-ի ռազմականացված թեւի` «Իզեդդին ալ Քասսամի բրիգադների» անդամները ստանձնել են Սաադ իսրայելական բնակավայրում դպրոցական ավտուբուսի վրա կրակ բացելու պատասխանատվությունը: Երկու իսրայելցի վիրավորվել էին, մեկը` ծանր:

Այդ միջադեպից հետո իսրայելական տանկերը եւ ռազմաօդային ուժերը մի քանի հարված էին հասցրել Գազայի հատվածին: Զոհվել էր 6 պաղեստինցի, տասնյակ մարդիկ վիրավորվել էին:

Իսրայելական զինվորական ներկայացուցչի խոսքերով` հարվածներն ուղղված են եղել Գազայի հատվածի 9 նպատակակետի, այդ թվում` ստորգետնյա թունելներին, որոնցով Եգիպտոսից զենք է բերվում Գազա: