Անդրդվելի Սամվել Ալեքսանյանը

Ուկրաինացի օղի արտադրողները զայրացել  են Սամվել Ալեքսանյանին պատկանող «Ալեքս Գրիգ» ընկերության վրա` իրենց արտադրանքը կեղծելու եւ անբարեխիղճ մրցակից լինելու համար:

Օրինակ` «Ալեքս Գրիգի» արտադրած «Ուկրաինա» օղին բավականին դժվար է տարբերել ուկրաինական «Ալեֆ-Վինալ» ընկերության արտադրած «Ուկրաինկա»-ից, «Խլոպվի»-ն ` ուկրաինական «Խորտիցա»-ից,  «Պրեմիումը»` ուկրաինական «Պրայմ»-ից. գրում է Экономические известия-ն:

Ըստ հրապարակման` Global Spirits ընկերության («Խորտիցա», «Շուստով», Oreanda ապրանքանիշեր) մարկետինգի գծով տնօրեն Գեորգի Մայորովը ասել է, որ թեեւ Հայաստանում  ուկրաինական օղիները կեղծվում են, սակայն  ուկրաինականն ու հայկականը տարբերակելը հեշտ է` հայկականն ավելի անորակ է եւ մի քանի անգամ էժան:

Ուկրաինացի գործարարներին մտահոգում է նաեւ այն, որ «Ալեքս Գրիգ»-ը պատկանում է ԱԺ պատգամավոր Սամվել Ալեքսանյանին, եւ  այս դեպքում դատարանի որոշումները ոչինչ փոխել չեն կարող:

Իսկ ահա Ուկրաինայի էկոնոմիկայի փոխնախարար Վալերի Պյատնիցկին հայտարարել է, որ այս հարցով աշխատում են Առեւտրի համաշխարհային կազմակերպության հետ, քանի որ  հայկական կողմի հետ մինչ այս պահը որեւէ եզրահանգման չեն եկել: Փոխնախարարը նաեւ նշել է, որ եթե ԱՀԿ-ի միջոցով էլ հարցը չլուծվի, Ուկրաինայի իշխանություններն այլ միջոցներ կձեռնարկեն: