Պանրի շուկան` վարչապետի ուշադրության կենտրոնում

Սննդամթերքի անվտանգությունը մեզ համար էական նշանակություն ունի, եւ մեր կանոնները պետք է համապատասխանեն եվրոպական ստանդարտներին, որպեսզի մեր առջեւ բացվեն եվրոպական շուկաները. այսօր կառավարության նիստի ժամանակ հայտարարել է ՀՀ վարչապետ Տիգրան Սարգսյանը:

Նա իր մտահոգությունն է հայտնել ամիսներ առաջ Եվրամիության պահանջով պանրի շուկայում իր վերահսկողական ծառայության իրականացրած ստուգումների կապակցությամբ, որոնց արդյունքում լրջագույն խախտումներ են հայտնաբերվել, ըստ վարչապետի` վտանգավոր ու մտահոգիչ:

«Մենք բյուջեից գումարներ ծախսեցինք, տասնյակ խանութներից հավաքագրեցինք պանիրը եւ անցկացրինք լաբորատոր ստուգումներ: Արդյունքները խիստ մտահոգիչ էին: Համապատասխան պատժամիջոցներ ու հանձնարարականներ կիրառվեցին այն ժամանակ»,-ասաց վարչապետը` անհրաժեշտ համարելով, որպեսզի 6 ամիս անց կրկին ստուգումներ իրականացվեն, որ պարզ լինի` խախտումներն ու թերությունները վերացե՞լ են, թե՞ ոչ: