Վարչապետի ուշադրության կենտրոնում է իրավաբանական անձանց լիցենզիա տրամադրելու գործընթացը

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը մի քանի հանձնարարականներ տվեց նախարարներին: Հանձնարարականներից մեկը վերաբերում էր իրավաբանական անձանց լիցենզավորման գործընթացին: Ըստ վարչապետի, գործող օրենսդրության համաձայն, կան լիցենզիաների տեսակներ, որոնք տրամադրվում են բացառապես իրավաբանական անձանց: Վարչապետի խոսքով՝ իրատեսական է լիցենզիաների որոշ տեսակները իրավանաբական անձանց տրամադրել բացառապես էլեկտրոնային եղանակով՝ օգտագործելով արդեն իսկ կայացած ենթակառուցվածքները:

«Հանձնարարում եմ լիցենզիա տրամադրող պետական մարմիններին` ուսումնասիրել իրավաբանական անձանց միայն էլեկտրոնային եղանակով լիցենզիաներ տրամադրելու հնարավորությունը և ներկայացնել առաջարկություններ: Կարծում եմ` պարզ է հանձնարարականի էությունը»,- ասաց Կարապետյանը:

Մյուս հանձնարարականը վերաբերում էր ընդերքը շահագործող կազմակերպություններին տրվող լիցենզիաներին: Մասնավորապես` հանձնարարվեց էներգետիկայի ենթակառուցվածքների և բնական պաշարների նախարարին` երեքշաբաթյա ժամկետում ներկայացնել ընդերքի ոլորտում տիրող ներկա վիճակի համալիր վերլուծություն` ըստ հանքավայրերի և տրված լիցենզիաների: