Առաջին 3D ֆիլմերը նկարահանվել են նացիստական Գերմանիայում

Բեռլինի դաշնային արխիվում հայտնաբերվել են դեռեւս նացիստական Գերմանիայում նկարահանված 3D ֆիլմեր: 1936 թվականին ստեղծված երկու 30-րոպեանոց սեւ-սպիտակ քարոզչական ժապավենները հայտնաբերել է ավստրալացի ռեժիսոր Ֆիլիպ Մորը. տեղեկացնում է mignews.com-ը:

«Ֆիլմերը նկարահանվել են երկու տեսախցիկով` հատուկ պրիզմայի կիրառմամբ: Դրանք պատրաստվել են անկախ կինոստուդիայի կողմից` Գեբելսի ղեկավարած քարոզչության նախարարության պատվերով, եւ կոչվել են «ռաում ֆիլմեր» կամ «տարածական ֆիլմեր»: Գուցե այդ պատճառով ոչ ոք չի հասկացել, որ խոսքը 3D ձեւաչափի մասին է»,- ասում է Մորը:

Ֆիլմերից մեկը երաժշտական է, կոչվում է` «Այնքան իրական, որ կարող եք ձեռք տալ»: Նկարահանված է դիմակահանդես, իսկ ամենատպավորիչ կադրում հանդիսատեսը զգում է, թե ինչպես է տապակվող նրբերշիկների յուղը ցայտում իր վրա: Երկրորդ ֆիլմը 6 ընկերուհիների արկածների մասին է:

Այսպիսով` կարելի է ասել, որ 3D ֆիլմերը ստեղծվել են Երկրորդ համաշխարհային պատերազմից առաջ` Գերմանիայում: Մինչ այդ համարվում էր, որ առաջին եռաչափ ֆիլմերը նկարահանվել են Հոլիվուդում` 1950-ականներին: