Սուրբ Նշան եկեղեցու օծման առաջին տարեդարձն է

Այսօր Արագածոտնի թեմի Երնջատափ գյուղի Սուրբ Նշան եկեղեցու օծման առաջին տարեդարձի առիթով մատուցվեց Սուրբ և Անմահ Պատարագ:

Մեկ տարի առաջ՝ սեպտեմբերի 28-ին, Սուրբ Նշան եկեղեցին օծվեց Արագածոտնի թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի ձեռամբ։

Այդ օրվանից եկեղեցին դարձավ Երնջատափի հավատավոր ժողովրդի աղոթքի տունը և հոգևոր կյանքի օջախը։

Օծման տարեդարձի առիթով Սուրբ և Անմահ Պատարագը մատուցեց Սուրբ Նշան եկեղեցու հոգևոր հովիվ Արժանապատիվ Տեր Մուշե քահանա Վահանյանը։

Սուրբ Պատարագին ներկա և աղոթակից էր Սաղմոսավանքի հովվության հոգևոր հովիվ՝ Արժանապատիվ Տեր Փառեն քահանա Առաքելյանը: Տեր Հայրն իր քարոզում, շնորհավորեց Մկրտիչ Սրբազանին և Տեր Մուշե քահանային, եկեղեցու օծման տարեդարձի առիթով ու հավատացյալներին փոխանցեց կարևոր պատգամ՝ ապրել քրիստոնեական գիտակցությամբ և հավատարիմ մնալ Աստծուն տրված կոչմանը։

Տեր Հայրն հորդորեց հավատացյալներին երբեք չմոռանալ իրենց հոգևոր ճանապարհի սկիզբն ու վերջը՝ գիտակցելով, թե որտեղից են եկել և ուր են գնում։ Չմոռանալ, որ իրենք Տիրոջ ժողովուրդն են՝ կանչված ապրելու ոչ միայն խոսքով, այլև հավատքով, գործով և քրիստոնեական պատասխանատվությամբ։

Եվ երբ գա այն պահը, երբ հավատքի ճանապարհը պահանջի խիզախություն ու անձնազոհություն, չամաչել Քրիստոսից, չվախենալ սեփական խաչից, այլ առհամարհել ամոթն ու մարդկային վախերը, վերցնել խաչը և հետևել Տիրոջը ու փոխանցեց Աստվածաշնչյան պատգամը.«Նայենք Յիսուսին՝ հաւատի Զօրագլխին, այն Կատարելագործողին, որն իր առաջ դրուած ուրախութեան համար յանձն առաւ խաչը, արհամարհեց ամօթը եւ նստեց Աստծոյ աթոռի աջ կողմում». Եբրայեցիներ 12.2