Նարեկ Կարապետյանի հայտարարությունը գնահատում եմ բավականին պրագմատիկ ու ռացիոնալ. Բադալյան

Քաղաքական մեկնաբան Հակոբ Բադալյանը գրում է.

«Ուժեղ Հայաստան կուսակցության խորհրդի ներկայացուցիչ Նարեկ Կարապետյանի այսօր արած կարճ հայտարարությունը գնահատում եմ բավականին պրագմատիկ ու ռացիոնալ: Ինչպես նշել եմ հունիսի 8-ին նախնական արդյունքից հետո, ներկայումս ընդդիմադիր առաջատար ուժերի գլխավոր խնդիրը խուճապի մեջ չընկնելը, «մանդրաժ» չապրելը, էմոցիոնալ գրոհներին դիմակայելն ու ռացիոնալության հունից դուրս չգալն է:

Նարեկ Կարապետյանի կարճ հայտարարությունը կամ տեսագրությունը վկայում էր, որ վերը նշածս հանգամանքների առումով իրավիճակը կարծես թե կառավարելի ու տիրապետելի է։

Սա կարեւոր է: Իհարկե շատ ուղղություններից եղել է քննադատական արձագանք, որ այդ խոսքը ակնարկ էր, որ կարող են վերցել մանդատները: Ինձ համար, ինչպես բազմիցս նշել եմ, այս հարցը արհեստական գեներացվող է՝ միանգամայն շահադիտական նպատակներով, որի գայթակղությանը ցավոք տրվում են նաե շատ անկեղծ ու հարգարժան մարդիկ:

Չկա մանդատ վերցնել-չվերցնելու հարց, որպես այդպիսին: Կա հարց՝ ընդդիմությունը դիմանու՞մ է պարտության հետ առերեսումից խուսանավելու գայթակղությանը եւ դրսեւորու՞մ է քաղաքականությամբ զբաղվելու կամք ու ռազմավարական համբերատարություն, թե՞ ոչ: Եթե որեւէ մեկին թվում է, թե մանդատ վերցնելու որոշումը հեշտ որոշում է, սխալվում եք՝ հարգարժան ընկերներ: 

Ընդդիմության համար այս պահին ամենից հեշտ որոշումը մանդատ չվերցնելն է: Բայց, ինչպես ասում են բրիտանացիները՝ դժոխքի ճանապարհը սալարկված է բարի մտադրություններով, ասել է թե՝ հեշտություններով: Մինչդեռ, դրախտի ճանապարհը պատված է փշերով: Ընդդիմությունից պահանջվում է փշերով անցնելու կամք ու համարձակություն: Սա իսկապես ամենաբարդն է, նվազ գայթակղիչը, բայց առավել ու հստակ պատասխանատուն: Ավելորդ եմ համարում ասել, որ դժոխքի ու դրախտի մասին ասույթների հիշատակումս ունի բացառապես ալեգորիկ բնույթ եւ ասոցացվում է քաղաքական հեռանկարների հետ»: