ՀԷՑ-ը զրկված է արդյունավետ դատական պաշտպանությունից. ՍԴ-ն մերժել է դիմումի քննությունը․ Pastinfo

 «Փաստինֆոն» գրում է, որ «ՀԷՑ» ՓԲԸ-ն դիմել է ՍԴ՝ վիճարկելով Էներգետիկայի մասին օրենքի 52.1-ին հոդվածի 3-րդ մասի՝ լիցենզավորված անձի գործադիր մարմնի բոլոր լիազորությունները ժամանակավոր կառավարչին անցնելու մասով սահմանադրականության հարցը։

Ըստ Դիմողի՝ սույն դեպքում եռաստիճան դատական համակարգի կողմից վիճարկվող նորմին տրված մեկնաբանությամբ, փաստացի, բացառվում է վերջինիս իրավունքների և ազատությունների դատական պաշտպանության արդյունավետ իրականացումը, քանի որ, ըստ տրված մեկնաբանության, կազմակերպության տնօրենը ժամանակավոր կառավարչի առկայության պայմաններում իրավասու չէ տալու լիազորագիր՝ կազմակերպության իրավունքները և ազատությունները, այդ թվում՝ դատական կարգով պաշտպանելու համար, և նման լիազորությունը վերապահված է ժամանակավոր կառավարչին։

Վիճարկվող դրույթների հետևանքով «ՀԷՑ» ՓԲԸ-ն այլևս չի կարող դիմել դատարան՝ ընդդեմ որևէ վարչական մարմնի կամ այլ անձի դեմ և արդյունավետորեն պաշտպանել իր իրավունքները և օրինական շահերը, իսկ նման հայց ներկայացնելու «անհրաժեշտությունը» որոշելը թողնվել է բացառապես ժամանակավոր կառավարչին, որը «շահագրգիռ չէ» հայց ներկայացնել իրեն նշանակած պետական մարմնի դեմ, այսինքն՝ մեկնաբանությունն իրավաչափ դիտարկելու պայմաններում ստացվում է, որ պետությունը, միջամտելով տնտեսվարողի գործունեությանը, կարող է բացառել նրա՝ պետության և պետական մարմինների, ինչպես նաև երրորդ անձանց դեմ հայց ներկայացնելու հնարավորությունը:

Դիմողը պնդել է, որ վիճարկվող դրույթը, այդ թվում՝ իրավակիրառ պրակտիկայում դրան տրված մեկնաբանությունը, ոչ միայն խախտում է Սահմանադրության 61 և 63-րդ հոդվածներով նախատեսված իրավունքները, այլև հակասում է Սահմանադրության 75 և 78-րդ հոդվածներին:

ՍԴ-ն, սակայն, որոշել է մերժել գործի քննությունը՝ դիմումի ակնհայտ անհիմն լինելու հիմքով։

Ավելին՝ սկզբնաղբյուրում։