Ռուս-վրացական սահմանին մոտ 2000 բեռնատար է մնացել․ «Ինտերֆաքս»

Հյուսիսային Օսիայի «Վերին Լարս» անցակետում՝ ռուս-վրացական սահմանը հատելու համար, առնվազն 1,9 հազար բեռնատար է կուտակվել: Այս մասին երեքշաբթի հայտնել է «Ինտերֆաքսը»՝ հղում անելով հանրապետության ղեկավարի և կառավարության մամուլի ծառայությանը:

«Հանրապետության տարածքում ներկայումս «Վերին Լարս» անցակետով պետական սահմանը հատելու իրենց հերթին սպասում է 1980 միավոր ծանրաքարշ մեքենա, իսկ էլեկտրոնային հերթում գրանցված է 1879 մեքենա», - ասվում է հաղորդագրության մեջ:

Մամուլի ծառայությունից հավելել են, որ Ռազմավիրական ճանապարհով և Անդրկովկասյան մայրուղով տրանսպորտի շարժն այս պահին սահմանափակ չէ:

Ռազմավիրական ճանապարհը միակ ցամաքային երթուղին է, որը կապում է Ռուսաստանը Վրաստանի և Հայաստանի հետ: