կարևոր
3949 դիտում, 22 ժամ առաջ - 2025-04-02 12:57
Հասարակություն

Կառավարությունը կհաստատի՞ արդյոք ագրարայինի ռեկտորի ակնհայտ ապօրինի ընտրության արդյունքերը

Կառավարությունը կհաստատի՞ արդյոք ագրարայինի ռեկտորի ակնհայտ ապօրինի ընտրության արդյունքերը

Մարտի 19-ին Հայաստանի ազգային ագրարային համալսարանի հոգաբարձուների խորհուրդը ռեկտոր է ընտրել պարտականությունները կատարող Հրաչյա Զաքոյանին ձայների 19 կողմ, 1 դեմ հարաբերակցությամբ:

Ըստ գործող կարգի՝ ռեկտորների ընտրության արդյունքները հաստատում է ՀՀ կառավարությունը: Yerkir.am-ը ներկայացնում է այն հարցերը, որոնց պատճառով կառավարությունը չպետք է հաստատի ընտրություն կոչվող ֆարսի արդյունքները.

ա) Գործող կարգի համաձայն՝ բուհի դասախոսական կազմից առաջադրվող 5 անդամները պետք է ընտրվեն գիտական խորհրդում, սակայն համալսարանի գիտական խորհուրդը նույնպես ձևավորված է կանոնադրական կոպտագույն խախտումներով:  

բ) «Կրթության մասին» ՀՀ օրենքի 28-րդ հոդվածով նախատեսվում է, որ բուհի ուսանողական խորհրդի կանոնադրությունը հաստատվում է կրթության պետական կառավարման լիազոր մարմնի կողմից: Ագրարայինի ուսխորհրդի կանոնադրությունը հաստատված չէ լիազոր մարմնի կողից, հետևաբար այն չէր կարող իրականացնել հոգաբարձուների խորհրդի 5 անդամ-ուսանողներին:

գ) Գործող իրավակարգավորումներով խորհրդում 5 անդամ առաջադրում է վարչապետը, 5-ին՝ լիազոր մարմինը: Ագրարայինի խորհրդում վարչապետին հատկացված քվոտայով ներկայացված են ԿԳՄՍ նախարարության 3 աշխատակիցներ /Ա. Սվաջյան, Ա. Պողոսյան, Լ. Գրիգորյան/: Ստացվում է, որ լիազոր մարմինը խորհրդում ներկայացված է ոչ թե 25 տոկոսով, այլ իրականում՝ 40 տոկոսով: Խախտված է կառավարության «ՀՀ պետական բարձրագույն ուսումնական հաստատության խորհրդի ձևավորման կարգը հաստատելու մասին» 23.06.2005 թ. թիվ 975-Ն որոշումը:  

դ) Համալսարանի 3 ամբիոնների վարիչներ /Ա. Խաչատրյան, Ն. Սիմոնյան, Գ. Եղիազարյան/ կանոնադրության համաձայն չեն կարող ընդգրկվել հոգաբարձուների խորհրդի կազմում, սակայն ընդգրկված են:

ե) 2023թ. օգոստոսին խորհրդում ուսանողության քվոտայով ընդգրկվել է հայցորդ Թոռնիկ Ալիյանը, այն դեպքում, երբ ուսանողության քվոտայով կարող են առաջադրվել միայն ուսանողներն ու ասպիրանտները:

զ) Խորհրդի՝ ուսանողության կողմից առաջադրված անդամ Արմեն Սոլոմոնյանը աշխատում է Բուսաբուծական մթերքների վերամշակման տեխնոլոգիաների ամբիոնում որպես ասիստենտ: Ստացվում է, որ համալսարանի ուսանողների շահերը հոգաբարձուների խորհրդում ներկայացնում է դասախոսը:

Թե ինչպես է ՀՀ կառավարությունը նման կոպիտ խախտումների պարագայում հաստատելու ապօրինի գործող հոգաբարձուների խորհրդի կողմից կազմակերպված ռեկտորի ընտրության արդյունքները, ցույց կտա ժամանակը:

Հ.գ. Ի դեպ, հոգաբարձուների խորհրդին մոտ կանգնած աղբյուրները հայտնեցին, որ միակ դեմ քվեարկած անդամը եղել է վարչապետի աշխատակազմի ղեկավար Արայիկ Հարությունյանի տեղակալ Զարուհի Մաթևոսյանը, ում վրա ԿԳՄՍ նախարար Ժաննա Անդրեասյանը չի կարողացել ազդել: