ԿԳՄՍ նախարարը «ուզուրպացրե՞լ է» ագրարայինի հոգաբարձուների խորհուրդը

ՀՀ կառավարության կողմից հաստատված բուհի խորհրդի ձևավորման կարգի համաձայն` խորհրդի կազմում հավասարապես առաջադրումն իրականացվում է հիմնադրի, լիազոր մարմնի, դասախոսական և ուսանողական կազմերի միջև՝ յուրաքանչյուրը 25 տոկոսի չափով: 

Հիմնադրի անունից խորհրդի անդամներ է առաջադրում Հայաստանի Հանրապետության վարչապետը՝ պետական պաշտոն և պետական ծառայության պաշտոն զբաղեցնող անձանցից: Լիազոր մարմնի կողմից խորհրդի անդամներ են առաջադրվում կրթության, գիտության, մշակույթի, սպորտի և տնտեսության տարբեր ոլորտների ներկայացուցիչներ:

Հայաստանի ազգային ագրարային համալսարանի խորհրդի 20 հոգուց 5-ին կամ 25 տոկոսին ներկայացրել է ԿԳՄՍ նախարար Ժաննա Անդրեասյանը: Վարչապետի կողմից առաջադրված 5 անդամից 3-ը՝ ԿԳՍՄ փոխնախարար Արաքսյա Սվաջյան, վարչության պետեր Արմենուհի Պողոսյան և Լուսինե Գրիգորյան, Ժաննա Անդրեասյանի անմիջական ենթականերն են: 

Ստացվում է, որ լիազոր մարմինը՝ ԿԳՄՍ նախարարությունը, ի դեմս տիկին Ժաննայի, ագրարայինի խորհրդում ներկայացված է ոչ թե օրենսդրությամբ սահմանված 25 տոկոսի, այլ դեֆակտո 40 տոկոսի չափով: Ի դեպ, ակնհայտ է, որ այս առերևույթ «ուզուրպացիան» տիկին Ժաննան իրականացրել է իր անմիջական ղեկավարի՝ Նիկոլ Փաշինյանի հաշվին: 

Հ.Գ. Առաջիկայում նաև կանդրադառնանք նաև մյուս բուհերին, որոնց խորհուրդները ևս առերևույթ «ուզուրպացվել են» նախարարի կողմից: