Անօդաչուների գրոհը կապված է Մոսկվա ԵԱՀԿ-ի գլխավոր քարտուղարի այցի հետ. Զախարովա

Մոսկվայի վրա անօդաչուների հարձակումը կապված է ԵԱՀԿ գլխավոր քարտուղարի այցի հետ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Առաջին անգամը չէ, որ օտարերկրյա բարձրաստիճան պատվիրակության այցը Մոսկվա ուղեկցվում է Ուկրաինայի ԶՈւ-ի անօդաչուների հարձակմամբ: Ահա և այս գիշեր Կիևի ռեժիմը անօդաչու սարքեր է ուղղել դեպի մայրաքաղաք, երբ պետք է այցելի ԵԱՀԿ գլխավոր քարտուղարը: Այն կազմակերպության ղեկավարը, որին Զելենսկու հովանավորները զրկել են սկզբնական իմաստից` Եվրոպայում անվտանգության և համագործակցության ապահովումից», - նշել է Զախարովան Telegram-ի ալիքում։

ԵԱՀԿ գլխավոր քարտուղար Ֆերիդուն Սինիրլիօղլուն մարտի 11-ին աշխատանքային այցով կլինի Մոսկվայում, որտեղ բանակցություններ կունենա ՌԴ արտգործնախարար Սերգեյ Լավրովի հետ։

Հիշեցնենք՝ Մոսկվայի և Մոսկվայի մարզի իշխանությունները հայտնել էին ուկրաինական անօդաչուների զանգվածային հարձակման մասին, ինչի հետևանքով մեկ մարդ է զոհվել, երեքը` տուժել են։ Մոսկվայի քաղաքապետ Սերգեյ Սոբյանինի տվյալներով` ՀՕՊ–ը շարունակում է հետ մղել Մոսկվայի վրա իրականացվող գրոհը։ Ներկա պահին դեպի Մոսկվա թռչող հակառակորդի 73 անօդաչու է խոցվել։