«Հինգ իրավապաշտպանների նախաձեռնությունն» ամբողջ կազմով ստանձնել է Էդգար Ղազարյանի պաշտպանությունը

«Հինգ իրավապաշտպանների նախաձեռնություն»-ը տեղեկացնում է, որ  ամբողջ կազմով ստանձնել է Էդգար Ղազարյանի պաշտպանությունը։

«Ընդդիմադիր գործիչ Էդգար Ղազարյանի նկատմամբ քրեական հետապնդումն իրենից ներկայացնում է ժողովրդավարական ավանդական չափորոշիչներով չարգելված քննադատական խոսքը լռեցնելու հակաիրավական նոր գործիքակազմի ներդրման փորձ։ «Հաջողության» դեպքում այն հետագայում կարող է կիրառվել ընդդիմադիր հայացքներ ունեցող գործնականում ցանկացած անձի նկատմամբ։

Ուստի «Հինգ իրավապաշտպանների նախաձեռնությունը» հույժ կարևոր է համարում այդ փորձի խափանումը հանրային իրազեկման, իրավական փաստարկման և օրենքով չարգելված այլ միջոցներով։

Նշվածի հիման վրա մենք որոշել ենք, Էդգար Ղազարյանի առաջարկությամբ և համաձայնությամբ, նրա պաշտպանությունը ստանձնել ամբողջ կազմով։

Իրավապաշտպաններ՝

Արսեն Բաբայան

Սերգեյ Հարությունյան

Վարազդատ Հարությունյան

Վահան Հովհաննիսյան

Ռուբեն Մելիքյան»

Հիշեցնենք՝ երեկ Լեհաստանում Հայաստանի արտակարգ և լիազոր նախկին դեսպան, քաղաքական-հասարակական Էդգար Ղազարյանը հայտնել էր, որ իրեն հրավիրել են ՀՀ քննչական կոմիտե: Փաստաբան Ռուբեն Մելիքյանի խոսքով՝ Էդգար Ղազարյանին մեղադրանք են ներկայացրել հրապարակային քննադատական խոսքի համար, որը ենթադրում է մինչև 5 տարվա ազատազրկում։