Ուկրաինայի զինված ուժերը Խերսոնին նախապատրաստում են ՌԴ ԶՈՒ-ին հակազդելու համար․ Սալդո

Խերսոնի շրջանի նահանգապետ Վլադիմիր Սալդոն հայտնել է, որ Ուկրաինայի Զինված ուժերի հրամանատարությունը զինյալներ է պատրաստում ռուս զինվորականներին հակազդելու համար։ Նրա խոսքով՝ ուկրաինական խմբավորումները հարձակման համար մարդկանց սուր պակաս ունեն։

«Զինվորական անձնակազմի թիվը չի բավականացնում նույնիսկ ձախ ափ տեղափոխելու փոքր փորձերի համար։ Ուստի խոսել այն մասին, որ հակառակորդը պատրաստվում է հարձակման աջ ափից ձախ, հավանաբար, օբյեկտիվ չի լինի։ Նա չի պատրաստվում: Բայց միևնույն ժամանակ նա անընդհատ պատրաստվում է նրան, որ մենք դա կանենք», - ասել է Սալդոն «РИА Новости»-ին տված հարցազրույցում։

Նա նաև վստահություն է հայտնել, որ Խերսոնը շուտով ամբողջությամբ կազատագրվի ուկրաինացի զինյալներից և կանցնի ռուս զինվորականների վերահսկողության տակ։

«Սա պատմական շրջան է։ Այն ստեղծել է Ռուսաստանը, այն կառուցել է Ռուսաստանը։ Այս բոլոր հողերի զարգացումը սկսվել է 250 տարի առաջ։ Պատմական արդարությունը հուշում է, որ այն եղել է, կա և կլինի»,- ընդգծեց նա։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։