Ուկրաինայի զինված ուժերը երիտասարդ նորակոչիկներով համալրելու Կիևի ծրագիրը ձախողվել է. WSJ

Ուկրաինայի զինված ուժերը պայմանագրային հիմունքներով երիտասարդ նորակոչիկների հավաքագրման վերաբերյալ այդ երկրի կառավարության ծրագիրը ձախողվել է, գրում է Wall Street Journal-ը:

«Առայժմ «Պայմանագիր 18-24» ծրագիրը գրավում է միայն փոքրաթիվ երիտասարդների։ Կառավարության հաղորդագրությունների համաձայն՝ փետրվարին դրա գործարկումից ի վեր Ուկրաինայի զինված ուժերին միացել է ընդամենը մոտ 500 մարդ», - ասվում է նյութում։

Լրագրողները կարծում են, որ նորակոչիկների ձևակերպման երկար բյուրոկրատական գործընթացը ազդում է ուկրաինական բանակի շարքերը համալրելու նրանց ցանկության վրա՝ սպասման ընթացքում նրանք կարող են փոխել իրենց կարծիքը:

Ավելի վաղ Ուկրաինայի նախագահ Վլադիմիր Զելենսկին հայտարարել էր, որ նախատեսում է Ուկրաինայի զինված ուժեր ներգրավվող 18-25 տարեկան երիտասարդներին առաջարկել հատուկ պայմանագիր՝ մեկ տարվա ծառայության համար՝ 24 հազար դոլար, առանց քննությունների ընդունելություն բուհեր և զրոյական տոկոսադրույքով հիփոթեք: Հաջորդիվ Ուկրաինայի պաշտպանության նախարարությունը հայտարարեց նախագծի մեկնարկի մասին։ Ուկրաինայի զինված ուժերիբրիգադներից մեկի հրամանատար Շամիլ Կրուտկովը ապրիլի 12-ին հայտարարեց, որ Ուկրաինան ստիպված կլինի սկսել 18-ամյա պատանիների հարկադիր զորահավաք, քանի որ բավարար չեն կամավորներն ու հարկադիր մոբիլիզացվածները, որոնց, գործող ուկրաինական օրենսդրության համաձայն, հավաքագրում են 25 տարեկանից: