Պատասխանատվությունը ստանձնել եմ այն ժամանակ, երբ Արցախից գրեթե բոլորը հրաժարվել են․ ԱՀ նախագահ

«Չորս տարի առաջ այս օրը Ադրբեջանը, Թուրքիայի, Իսրայելի ու այլ պետությունների աջակցությամբ, լայնածավալ հարձակում է  սկսել Արցախի, ինչու չէ նաև՝ Հայաստանի վրա»: Այս մասին, «Եռաբլուր» զինվորական պանթեոնում լրագրողների հետ զրույցում ասաց Արցախի Հանրապետության նախագահ Սամվել Շահրամանյանը։

Նրա խոսքով՝ զինված ուժերն ընդունել են հարվածն ու հակահարված տվել։

«Նրանց շնորհիվ հնարավոր է եղել կանխել պատերազմի առավել աղետալի հետևանքները։ Ես համարում եմ, որ 44-օրյա պատերազմի արդյունքներով դրվել է Արցախի ճակատագիրը կանխորոշելու սկիզբը: 2023 թվականին կատարվածը ես համարում եմ դրա հետևանքը»,-ասաց Սամվել Շահրամանյանը:

Ինչ վերաբերում է պատերազմում պարտության մեղավորների մասին հարցին, Արցախի նախագահն ասաց. «Հայաստանում բազմաթիվ քրեական գործեր կան հարուցված, գործել է ԱԺ-ում համապատասխան հանձնաժողով, որն առաջիկայում երևի կհրապարակի եզրակացությունները ու համապատասխան եզրակացություններ կանենք։ Հանձնաժողովի եզրակացությունն էլ կլինի հիմք մեզ համար, և ոչ միայն դա, մենք ունենք մեր կարծիքները, բայց  դրանց մասին կարելի է խոսել համապատասխան քրեական գործերի արդյունքների տեղեկանալով»,-ասաց Արցախի նախագահը՝ հավելելով, դեռ չի կարող քրեական գործերի վերաբերյալ մեկնաբանություններ տալ:
 

Մանրամանս՝ տեսանյութում։