ՆԱՏՕ-ն հաստատել է նոր գլխավոր քարտուղարին

ՆԱՏՕ-ն հաստատել է Նիդերլանդների վարչապետ Մարկ Ռյուտեին հաջորդ գլխավոր քարտուղարի պաշտոնում, հայտնում է France-Presse-ը՝ վկայակոչելով կազմակերպության հայտարարությունը, փոխանցում է РИА Новости-ն։

«ՆԱՏՕ-ն Նիդերլանդների վարչապետ Ռյուտեին նշանակում է հաջորդ ղեկավար», - ասված Է գործակալության հաղորդագրության մեջ:

Նշանակումը հնարավոր դարձավ այն բանից հետո, երբ մեկ այլ թեկնածու՝ Ռումինիայի նախագահ Կլաուս Յոհանիսը հանեց իր թեկնածությունը։

Յենս Ստոլտենբերգը ողջունել է իր իրավահաջորդի նշանակումը՝ X սոցիալական ցանցում գրելով, որ ՆԱՏՕ-ին թողնում է «հուսալի ձեռքերում»:

Ինչպես հայտարարել է ինքը ՝ Ռյուտեն, Նիդերլանդների կառավարության ղեկավարի պաշտոնից հեռանալուց հետո նա նախատեսում է երեք ամիս անցկացնել արձակուրդում, իսկ հետո աշխատանքի անցնել ՆԱՏՕ-ի գլխավոր քարտուղարի պաշտոնում:

Ստոլտենբերգը, որը կազմակերպությունը ղեկավարում է 2014 թվականից, պետք է պաշտոնը թողներ դեռևս 2022 թվականի հոկտեմբերի 1-ին, սակայն դաշինքի անդամ երկրների ղեկավարները նրա մանդատը երկարացրել են մինչև 2023 թվականի սեպտեմբերի 30-ը, իսկ հետո ևս մեկ տարով։ Այսպիսով, նրա լիազորությունների ժամկետը լրանում է 2024 թվականի հոկտեմբերի 1-ին ։