կարևոր
13831 դիտում, 5 ամիս առաջ - 2024-01-13 13:44
Տնտեսական

Թուրքական թեզերը թարգմանում են հայերեն ու ներկայացնում իբրև ազգային. Թադևոս Ավետիսյան

Երեկ պաշտոնապես հայտարարվեց, որ Մարգարայի անցակետն ամբողջովին  պատրաստ է շահագործման․ ՀՀ իշխանությունների  այս  խանդավառությունը, սակայն, չեն կիսում տնտեսագետներն ու հանրային շրջանակները, որի մասին  պարբերաբար բարձրաձայնում են։ Թեմայի վերաբերյալ Yerkir.am-ը զրուցել է ՀՅԴ Հայաստանի ԳՄ անդամ, ԱԺ «Հայաստան» խմբակցության պատգամավոր, տնտեսագետ  Թադևոս Ավետիսյանի հետ՝ պարզելու, թե գյուղատնտեսության առումով ինչ ռիսկայնություն կարող է ունենալ Մարգարայի անցակետի շահագործումը։

«Օբյեկտիվորեն մեր գյուղատնտեսությունը չունի բավարար, առարկայական հնարավորություններ՝ իրենց հետ արդյունավետ մրցակցելու․  Թուրքիան ու Ադրբեջանը 5 անգամ ավելի ուժեղ են բռնում գյուղացու ձեռքը, քան՝ ՀՀ այս իշխանությունը։  Երկրորդ՝ էներգետիկ ռեսուրսներն անհամեմատ ավելի մատչելի են Թուրքիայում և Ադրբեջանում գյուղացու համար, խոսքը ջերմոցայի տնտեսության մասին է, այստեղ ծախսերն անհամեմատ բարձր են, իսկ հատուցում էլ անհամեմատ ցածր է գյուղացու համար։ Դա է պատճառը, որ էապես ավելացել է գյուղատնտեսական ջերմոցների վաճառքի թիվը Հայաստանում։ Հաջորդը՝ տնտեսական անվտանգությանն է վերաբերվում․ իրականում համոզված եմ, որ թշնամի հարևաններն ամեն ինչ ունեն ռազմավարության մեջ, որպեսզի Հայաստանի նկատմամբ կիրառեն էքսպանսիայի և հակադրման ողջ ուժը։ Խաղաղության կեղծ օրակարգերի շուրջ այդ խանդավառությունները, թե՝  սահմանը բացենք, որ լավ ապրենք,  մանիպուլյացիաներ են։ Դոմինանտություն ունենալով ռազմական ճակատում  և ռազմական ուժի գործադրման ոլորտում՝ իրենք չեն վարանելու նաև այդ դոմինանտությունը հաստատելու տնտեսական ճակատում,  մնացածը խաբկանք է, սուտ և կեղծիք, որը ձեռնտու է ոչ միայն Թուրքիային այլև՝ Հայաստանի օրվա իշխանություններին,  որովհետև դրանով են իրենք իրենց իշխանությունը պահում»,-ասաց Թադևոս Ավետիսյանը։

«Գյուղատնտեսությունն այս իշխանության օրոք և տնտեսության իրական հատվածը, բազմից եմ ասել, գտնվում է ազատ անկման մեջ, գնալով նվազում են ծավալները և ավելանում են խնդիրները, իսկ լուծումներն ընդամենը պոպուլսիտական են, ոչնինչ չտվող»,- վստահեցրեց ընդդիմադիր պատգամավորը։

Թեմայի շարունակությունը՝ տեսանյութում։