Չավուշօղլուն և Հուլուսի Աքարն այլևս նախարարներ չեն. Էրդողանը հրապարակել է նոր կաբինետի կազմը

Թուրքիայում մայիսին տեղի ունեցած նախագահական ընտրություններում հաղթելուց հետո Ռեջեփ Թայիփ Էրդողանը հրապարակել է կառավարության նոր կազմը։

Գրեթե 9 տարի պաշտոնավարելուց հետո իր նախարարական պորտֆելին հրաժեշտ տվեց ԱԳՆ արդեն նախկին ղեկավար Մևլյութ Չավուշօղլուն, ում կփոխարինի Թուրքիայի Ազգային հետախուզական ծառայության` MİT-ի ղեկավար Հաքան Ֆիդանը։ Իսկ MİT-ը կղեկավարի 2014-ից ի վեր Էրդողանի մամուլի խոսնակ և խորհրդական աշխատած Իբրահիմ Քալընը։

ՊՆ արդեն նախկին ղեկավար Հուլուսի Աքարին, ով պաշտոնավարում էր 2018 թ. ի վեր, կփոխարինի Թուրքիայի ԳՇ պետ Յաշար Գյուլերը։

Թուրքիայի Ներքին գործերի նախարարի պաշտոնում Էրդողանի իշխանության ամենաակնառու գործիչներից մեկին՝ Սուլեյման Սոյլուին կփոխարինի Ստամբուլի նահանգապետ Ալի Յերլիքայան։