կարևոր
3193 դիտում, 1 տարի առաջ - 2023-01-20 23:42
Հասարակություն

14 զինծառայողի դին հայտնաբերվել է մահճակալներին անշարժացած, մեկին՝ դռան մուտքի մոտ

14 զինծառայողի դին հայտնաբերվել է մահճակալներին անշարժացած, մեկին՝ դռան մուտքի մոտ

Վաշտի կացարանում հրդեհի հետեւանքով մահացած 15 զինծառարողներից 14-ին փրկարարները հայտնաբերել են մահճակալներին անշարժացած պառկած վիճակում, իսկ մեկին՝ դռան մուտքի մոտ։

Այս մասին Հանրային հեռուտաընկերության եթերում հայտնել է ՀՀ ՆԳՆ Փրկարար ծառայության գնդապետ Արսեն Սարոյանը։

«Վարկած է, որ տղաները ծխահարվել են և ուղղակի չեն արթնացել, անկողնուց վեր չեն կացել։ Մի հոգին մուտքի մոտ է հայտնաբերվել», - ասաց Սարոյանը՝ ավելացնելով, որ նա թերեւս փորձել է փրկվել բայց չի ստացվել։

Գնդապետը նաեւ տեղեկացրել է, որ կացարանում գտնվել են 21 հոգի, որոնցից վեցը դուրս են եկել իրենց ուժերով` մինչ փրկարարների հասնելը, երեքն էլ տարբեր այրվածքներով տեղափոխվել են բուժկենտրոն։

Ըստ նրա` կրակի արագ տարածման պատճառը, ամենայն հավանականությամբ, եղել է այն, որ շինությունը քարե չի եղել, ավելին` չեն եղել նաեւ հրդեհամամարման սարքեր։

Հիշեցնենք, որ հրդեհը բռնկվել է հունվարի 19-ին՝ ժամը 01:30-ի սահմաններում, դեռևս չպարզված հանգամանքներում` Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում, որի հետևանքով զոհվել է 15 զինծառայող, 3-ը` այրվածքներով տեղափոխվել հիվանդանոց: