Երկու զինծառայողի դի է հայտնաբերվել. մեկին այդ օրը Ջաբրայիլից պետք է տեղափոխեին

Մայիսի 3-ին ԼՂՀ-ում մահացել են 2 ժամկետային զինծառայողներ: Yerkir.am-ի հետ զրույցում ՀՀ քննչական կոմիտեի նախագահի խորհրդական Սոնա Տռուզյանը հայտնեց, որ հայտնաբերվել են 2  զինծառայողի՝ Կորյուն Հարությունյանի և Իգոր Հակոբյանի դիերը:

«Արտաքին զննությամբ` հրազենային, բեկորային վնասվածքներ չեն ունեցել զինծառայողները: Նշանակվել է դատաբժշկական փորձաքննություն»,- ասաց նա:

19-ամյա Կորյուն Հարությունյանը Գեղարքունիքի մարզի Գեղամասար համայնքից էր: Համայնքի ղեկավարը` Գարեգին Բոգյանը, տեղեկացրեց, որ Կորյունին 6 ամիս էր մնացել, որպեսզի զորացրվեր: «Տղային Ջաբրայիլից պետք է տեղափոխեին, և հենց այդ գիշերն էլ տեղի է ունեցել դեպքը: Հայր, մայր, քույր ու եղբայր ունի: Եղբայրը պայմանագրային զինծառայող է` գյուղի զորամասում է ծառայում, իսկ քույրն ամուսնացել, գնացել է գյուղից: Հայրն ու մայրը չեն աշխատում, եղբայրն է ընտանիքը պահում»,- ասաց նա:

Երեկ զինվորի աճյունը Ղարաբաղից տեղափոխել են Գեղամասար: Զինծառայողի հոգեհանգստի արարողությունը տեղի կունենա վաղը: