Իրանը դեմ է Կովկասյան տարածաշրջանում օտարերկրյա ռազմական ներկայությանը ցանկացած պատրվակով. Ռայիսին՝ Ալիեւին

Իրանը դեմ է Կովկասյան տարածաշրջանում օտարերկրյա ռազմական ներկայությանը ցանկացած պատրվակով։ Այս մասին Ադրբեջանի նախագահ Իլհամ Ալիեւի հետ հանդիպման ժամանակ հայտարարել է Իրանի նախագահ Էբրահիմ Ռայիսին։

Իրանի նախագահի մամուլի ծառայությունից հայտնում են, որ Ռայիսին նշել է Հայաստանի ու Ադրբեջանի տարածքային ամբողջականությունը հարգելու անհրաժեշտությունը՝ ընդգծելով, որ Իրանը դեմ է տարածաշրջանի պատմական եւ աշխարհաքաղաքական սահմանների եւ Իրանի ու Հայաստանի տարանցիկ կարգավիճակի ցանկացած փոփոխության։

Հիշեցնելով, որ Իրանի Իսլամական Հանրապետությունն առաջին երկիրն է, որը «ողջունել է Լեռնային Ղարաբաղի ազատագրումը», Ռայիսին հավելել է, որ Իրանը պատրաստ է օգտագործել իր մեծ ներուժը՝ Երեւանի եւ Բաքվի միջեւ տարաձայնությունները լուծելու համար։

Իր հերթին Ալիեւը Իրանի նախագահին տեղեկացրել է տարածաշրջանային իրադարձությունների եւ Ադրբեջանի ու Հայաստանի միջեւ բազմակողմ բանակցությունների վերջին կարգավիճակի, այդ թվում՝ Պրահայում հանդիպումների մասին։ Նա նաեւ ընդգծել է Իրանի Իսլամական Հանրապետության միջազգային սահմանները պահպանելու եւ հարգելու անհրաժեշտությունը։

Միաժամանակ, Իրանի նախագահի աշխատակազմի ղեկավարի քաղաքական հարցերով տեղակալ Մոհամմադ Ջամշիդին Twitter-ում գրել է. «Նախագահ Ռայիսին Ադրբեջանի նախագահ Ալիեւին հասկացրել է, որ պատմական սահմանների, տարածաշրջանային աշխարհաքաղաքականության եւ Իրան-Հայաստան տարանցիկ երթուղիների ցանկացած փոփոխություն անընդունելի է: Նաեւ մերժվում է եվրոպական ռազմական ներկայությունը ցանկացած պատրվակով: Արեւմուտքը չի կարող ռազմավարական առումով շեղել մեզ»։