Չենք ուզում էս նիստը վարեք. զոհված զինծառայողների հարազատները՝ դատավոր Բիշարյանին

Վարչապետ Նիկոլ Փաշինյանի կողմից առերեւույթ պետական դավաճանության հատկանիշներով քրեական գործ հարուցելու պահանջով՝ փաստաբան Հակոբ Մարտիրոսյանի եւ «Հայաստան» խմբակցության պատգամավոր  Արծվիկ Մինասյանի բողոքի քննության ժամանակ Վերաքննիչ քրեական դատարանի դատավոր Կարեն Բիշարյանին ինքնաբացարկի միջնորդություն ներկայացվեց։

Ըստ փաստաբանի՝ դատավոր Կարեն Բիշարյանին բողոքը մակագրվել է դատարանի նախագահի կողմից՝ ձեռքով, ընդ որում՝ երաշխիքներ չեն ներկայացվել՝ արդյո՞ք պահպանվել է օրենքով սահմանված՝ այբբենական մակագրման կարգը։

Անդրադառնալով ներկայացված առարկությանը՝ Արծվիկ Մինասյանն ասաց. «Տպավորություն է, որ մենք առաջին անգամ ենք քննարկում այս հարցերը։ Այդ դեպքում ո՞ւր էին դատախազները, երբ դատավորն ասում էր՝ ծանուցել է, եւ իրենք չեն եկել դատական նիստին, բայց գալիս են այստեղ ծնողների բողոքի հիման վրա եւ հայտարարում, որ դատարանից ծանուցում չեն ստացել։ Այս պահի դրությամբ անաչառ դիտորդի մոտ ձեւավորված հստակ պատկերացում կարող է լինել այն, որ դատարանն օրենքի հիման վրա ստեղծված դատարան չէ»։

Նշենք, որ դեռեւս 2021 թվականի հունիս ամսին նրանք հանցագործության մասին հաղորդում էին ներկայացրել՝ մասնավորապես, պահանջելով քրեական գործ հարուցել Նիկոլ Փաշինյանի կողմից կատարված առերեւույթ պետական դավաճանության փաստի առթիվ։

Ներկայացված հանցագործության մասին հաղորդմամբ՝ Հակոբ Մարտիրոսյանը ներկայացրել է փաստական հանգամանքներ, որոնք առերեւույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։

Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն, եւ դատախազության անգործության դեմ փաստաբանը բողոք է ներկայացրել դատարան։ Երեւանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ,  մերժել էր բողոքը։ Դատարանի այս որոշման դեմ վերաքննիչ բողոք է ներկայացվել, որը մակագրվել է Վերաքննիչ քրեական դատարանի դատավոր Կարեն Բիշարյանին։