Զեյթունում իրավիճակը լարվեց. ոստիկանները անակնկալ հարձակվեցին եւ սկսեցին ուժով բերման ենթարկել ցուցարարներին

Երեւանի Զեյթուն թաղամասում՝ «Երեւան Սիթի»-ի մոտ, «Դիմադրություն» շարժման անհնազանդության երթի ժամանակ իրավիճակը լարվեց: Ցուցարարները ինչ-որ պահի նստեցին փողոցում եւ սկսեցին հայրենասիրական երգ երգել: Այդ պահին սեւ եւ կարմիրբերետավորները, առանց զգուշացնելու, հարձակվեցին ցուցարարների վրա եւ սկսեցին ուժով բերման ենթարկել նրանց: Ցուցարարներից մեկը շիշ նետեց ոստիկանենրի ուղղությամբ:

Մեծ հրմշտոց սկսվեց, ոստիկանները  ցուցարարներին պարզապես առեւանգումը էին հոծ բազմության միջից:

Ցուցարարներն սկսեցին վանկարկել՝ «Նիկոլ, դավաճան»:

ԱԺ փոխխոսնակ Իշխան Սաղաթելյանը հայտարարեց. «Ինչքան ձերբակալեն, 10 էդքան ավելանալու ենք»:

Այնուհետեւ իրավիճակը հանդարտվեց, եւ ընդդիմադիրները շարունակեցին իրենց երթը Դավիթ Անհաղթի փողոցով:

Նշենք, որ նախօրեին ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հայտարարեց, որ այսօր՝ ժամը 12-ին, չորս ուղղությունով սկսելու են անհնազանդության երթեր և ակցիաներ։ Առաջին երթը կմեկնարկի Գայի պողոտայից՝ «Մեգամոլ» առևտրի կենտրոնի մոտից, երկրորդը Րաֆֆու փողոցից՝ Անդրանիկի արձանի մոտից, երրորդը՝ 15 թաղամասից՝ Չաուշի արձանի մոտից, և չորրորդը՝ Սասունցի Դավթի արձանի մոտից։

Ժամը 19.00-ին Ֆրանսիայի հրապարակում տեղի կունենա ամփոփիչ հանրահավաք։

Մայիսի 2-ից խաղաղ անհնազանդության ակցիաներ են սկսվել Երեւանում, ամեն օր փակվում են մի շարք փողոցներ: Մայիսի 2-ից Երևանի Ֆրանսիայի հրապարակում հանրահավաքներ են իրականացվում։