ԱՄՆ-ի հույները իշխանություններին կոչ են անում Թուրքիային կործանիչներ չմատակարարել

ԱՄՆ-ի հունական համայնքը Թուրքիային կործանիչներ մատակարարելու դեմ արշավ է նախաձեռնել։

«Թուրքիան ռմբակոծում է խաղաղ բնակիչներին, հարձակվում ամերիկացիների վրա ամերիկյան հողում, սպառնում ԱՄՆ դաշնակիցներին պատերազմով և հրաժարվում է պատժամիջոցներ կիրառել Ռուսաստանի դեմ՝ միաժամանակ ապահով ապաստան տրամադրելով նրա օլիգարխներին: Այժմ նրանք ցանկանում են, որ ամերիկացիները, որպես պարգեւ, իրենց զենք վաճառեն»,- ասվում է հունական համայնքի «Hellenic Leaders»-ի Twitter-ի պաշտոնական էջում։

Հույները կոչ են անում բոլորին, ովքեր համաձայն են, որ Թուրքիային օդանավ չմատակարարվի, տարածել այս գրառումը և աջակցել քարոզարշավին։

Հիշեցնենք, որ Անկարան ԱՄՆ-ից պահանջել է Ֆ-16 կործանիչներ և թուրքական Ֆ-16-երի արդիականացման փաթեթներ Ֆ-35 կործանիչների ծրագրից դուրս թողնվելուց հետո, սակայն Վաշինգտոնը դեռ որոշում չի կայացրել այս հարցում։ Պետքարտուղարությունն իր հերթին կարծում է, որ այդ ինքնաթիռների մատակարարումը Թուրքիային բխում է Միացյալ Նահանգների ազգային շահերից։