Սերժ Սարգսյանն այսօր կլինի հանրահավաքի մասնակիցների շարքերում՝ ժողովրդի հետ. Արմեն Աշոտյան

Հայաստանի Հանրապետական կուսակցության նախագահ Սերժ Սարգսյանը մասնակցելու է այսօր Ազատության հրապարակում հրավիրված հանրահավաքին․ լրագրողների հետ հանդիպման ժամանակ ասաց ՀՀԿ փոխնախագահ Արմեն Աշոտյանը։ 

«Մասնակցելու է ոչ միայն որպես կազմակերպիչ ուժերից մեկի ղեկավար, ՀՀԿ նախագահ, մասնակցելու է ոչ միայն որպես Արցախի և Հայաստանի ազատության և անվտանգության համար հսկայական «ամագ» ունեցող մարդ, այլև մասնակցելու է նաև որպես ՀՀ մտահոգ քաղաքացի։ Քաղաքացի, որը տանը նստել չի կարող, երբ տեսնում է, թե ինչ է կատարվում երկու հայկական միավորների շուրջը։ Պատկերացրեք, թե ինչ օրհասական է վիճակը, որ նախագահ Սերժ Սարգսյանը ոչ միայն կազմակերպում է պայքար գործող իշխանությունների դեմ և Արցախի համար, այլ նաև անձամբ մասնակցում է այդ հանրահավաքին։ Վերջին անգամ այսպիսի օրհասական վիճակ եղել է, երբ հանդիպել են ՀՀ երեք նախագահները՝ Տեր-Պետրոսյանը, Քոչարյանը և Սարգսյանը», - ասաց Արմեն Աշոտյանը։