Անպտղության հաղթահարման ծրագրի արդյունքում Հայաստանում 2021 թ.-ին 76 երեխա է ծնվել, 211 հղիություն է գրանցվել

Անպտղության հաղթահարման ծրագրի արդյունքում Հայաստանում 2021 թ.-ին 76 երեխա է ծնվել եւ 211 հղիություն է գրանցվել: Այս մասին հայտնել է ՀՀ առողջապահության նախարար Անահիտ Ավանեսյանը Առողջապահության հարցերի մշտական հանձնաժողովի արտահերթ նիստի ժամանակ:

Ծրագրի շահառու է դարձել 850 քաղաքացի: Նախարարի խոսքով, ծրագիրը շարունակական է, եւ ակնկալվում է, որ այս տարի ավելի լավ արդյունքներ են լինելու:

Ավանեսյանը հիշեցրեց, որ նախորդ տարի մարդու վերարտադրողական օժանդակ տեխնոլոգիաներից օգտվելու պետական ծրագրում մի շարք փոփոխություններ էին մտցվել. մասնավորապես, ընդլայնվել էր ծրագրի շահառուների ցանկը, քանի որ դրա մեջ ներառվել էին սահմանամերձ տարածքներից շահառուները, ինչպես նաեւ ռազմական գործողությունների ընթացքում որդի կորցրած զույգերը: Ավելին, վերջիններիս հնարավորություն է տրվել պետպատվերով օգտվել փոխնակ մոր ծառայությունից, ինչը կմեծացնի նրանց՝ երեխա ունենալու շանսերը: