Բանակը քաղաքականացված չի եղել և չի էլ լինի․ ԳՇ պետի ժամանակավոր պաշտոնակատար Կամո Քոչունց

ԶՈՒ գլխավոր շտաբի պետի ժամանակավոր պաշտոնակատար Կամո Քոչունցը  չի կարծում, որ բանակը քաղաքականացված կդառնա, եթե գլխավոր շտապի պետը դառնա պաշտպանության փոխնախարարը: Այս մասին  այսօր` մարտի 5-ին, լրագրողների հետ զրույցում ասաց նա` պատասխանելով հարցին, թե մտավախություն չկա՞, որ եթե ԳՇ պետը դառնա պաշտպանության փոխնախարարը, ապա բանակը կքաղաքականացվի:

«Բանակը քաղաքականացված չի եղել և չի էլ լինի»,- ասաց նա:

Հարցին, թե հնարավոր համարո՞ւմ է իր նշանակումը ԳՇ պետի պաշտոնում, Կամո Քոչունցը չպատասխանեց: «Լավ մնացեք, շնորհակալություն»,- ասաց նա:

Նշենք, որ այսօր` սպարապետ Վազգեն Սարգսյանի ծննդյան օրը, պաշտպանության նախարարության բարձրաստիճան ղեկավար կազմն այցելել էր Եռաբլուր, ծաղիկներ խոնարհել Վազգեն Սարգսյանի շիրիմին:

Վազգեն Սարգսյանն  այսօր կդառնար 63 տարեկան: