Կան նույնականացված մասունքներ, մարմիններ, որոնք դեռ հուղարկավորված չեն. Անահիտ Ավանեսյան

Մենք ունեինք դժվար հետազոտվող մասունքներ, որոնք քայքայցած էին, և դժվար էր դրանցից ԴՆԹ առանձնացնելը, կառավարության նիստից հետո լրագրողների հետ զրույցում ասաց Անահիտ Ավանեսյանը։

«100-ից ավելի մասունք ուղարկեցինք Հոլանդիա, ստացանք դրանց արդյունքները, և այդ փուլը ևս ավարտվել է։ Կարելի է ասել, որ նույնականացման գործընթացն ամբողջովին մենք ավարտել ենք և ներկայումս հետազոտման մեջ չունենք որևէ փորձանմուշ»,- ասաց նա։

Նախարարը հայտնեց, որ կան նույնականացված մասունքներ, մարմիններ, որոնք դեռ հուղարկավորված չեն։ Կան նաև մասունքեր, որոնց նույնականացումն անհնար է իրականացնել, դրանք առանձին արխիվացված են, սակայն թվեր չնշեց, ասաց, որ թվերի հետ կապված պատկան մարմինը Քննչական կոմիտեն է, և ինքը թվեր հնչեցնելու իրավասություն չունի։

Անահիտ Ավանեսյանը վստահեցրեց նաև, որ բոլոր դիահերձարանները վերանորոգումից հետո համապատասխանում են անհրաժեշտ չափանիշներին, ապահովված են սառնարաններով, իսկ այն ցավալի պատկերը, որին հասարակությունն ականատես եղավ 2021 թվականին, երբ զոհված զինծառայողների աճյունները պարկերով ընկած էին գետնին, «կոնկրետ աշխատակիցների ոչ պատշաճ վերաբերմունքի արդյունք էր»։