2 տարի առաջ - 2022-02-04 21:44 
Մեծ Բրիտանիայի վարչապետի չորս մերձավոր օգնականներ բառացիորեն մի քանի ժամվա տարբերությամբ որոշել են հեռանալ իրենց պաշտոններից՝ կառավարության ղեկավարի հետ տարաձայնությունների պատճառով: Փետրվարի 4-ին այդ մասին հաղորդել է BBC հեռուստառադիոհաղորդումների կորպորացիան:
Ջոնսոնի՝ ներքին քաղաքականության կառավարման գրասենյակի ղեկավար Մունիրա Միրզայից անմիջապես հետո պաշտոնաթող են եղել հասարակայնության հետ կապերի տնօրեն Ջեկ Դոյլը, աշխատակազմի ղեկավար Դեն Ռոզենֆելդը եւ վարչապետի անձնական քարտուղար Մարտին Ռեյնոլդսը: Ջոնսոնի օգնականների պաշտոնաթողությունը տեղի է ունեցել, ինչպես նշում է BBC-ն, կառավարող Պահպանողական կուսակցությունում նրա առաջնորդության նկատմամբ աճող քննադատության ֆոնին:
Վերջին օրերին մի շարք բրիտանացի պատգամավորներ, այդ թվում պահպանողականներ, վարչապետին կոչ են արել ներողություն խնդրելու ընդդիմադիր Լեյբորիստական կուսակցության առաջնորդ Քիր Սթարմերից՝ արված հայտարարությունների լույսով, սակայն կառավարության ղեկավարը մինչեւ հիմա հրաժարվում է իր խոսքը հետ վերցնել:
Հունվարի 31-ին Ջոնսոնը, ելույթ ունենալով Մեծ Բրիտանիայի խորհրդարանի Համայնքների պալատում, Սթարմերին, որը 2008-ից մինչեւ 2013 թվականը գլխավորել է Թագավորության դատախազական ծառայությունը, մեղադրել է այն բանում, որ նրա գերատեսչության թողտվությամբ բրիտանացի ռադիոհաղորդավար Ջիմմի Սեւիլը (1926 – 2011) չի ենթարկվել քրեական պատասխանատվության՝ իբր դեռահասների նկատմամբ սեռական բռնության՝ տեղ գտած բազմաթիվ դեպքերի պատճառով: Բրիտանացի քաղաքագետների կարծիքով՝ մերձավոր օգնականների պաշտոնաթողությունը կդառնա եւս մեկ հարված Ջոնսոնի համար, որը լուրջ ճնշման է հանդիպում ընդդիմության եւ մի շարք պահպանողականների կողմից Դաունինգ սթրիթում երեկույթների հետ կապված սկանդալի պատճառով, որոնք տեղի էին ունեցել համավարակի առաջին ալիքի խիստ սահմանափակիչ միջոցների գործողության շրջանում, հաղորդել է ՏԱՍՍ-ը:
2024-11-22 15:10
