ՏԵՍԱՆՅՈՒԹ. Ադրբեջանցիները օր օրի առաջ են գալիս, օրեցօր դիրքեր ենք կորցնում, սարսափելի վիճակ է. ճակատենցի

Yerkir.am-ը օրերս եղել է Սյունիքի մարզի Կապան քաղաքում, զրուցել տեղացիների հետ սահմանային խնդիրների, անվտանգային հարցերի, մարզում ադրբեջանական զորքի առկայության եւ այլ հարցերի շուրջ:

Ճակատենի մի բնակիչ, որն այդ ժամանակ գտնվում էր Կապանում, մեզ հետ զրույցում ասաց, որ սարսափելի վիճակ է, ժողովրդի հետագա ճակատագիրը ոչ ոք չի կարող ասել:

«Շատ մեծ վտանգի մեջ ենք, հատկապես՝ սյունեցիները, Սյունիքի մարզը: Ես այս վտանգի ներքո ապագա չեմ տեսնում: Թե իշխանությունն ի՞նչ է մտածում, չգիտես, կառավարություն չունենք»,- ասաց նա:

Դիտարկմանը, թե Փաշինյանն ասել է՝ Սյունիքով ճանապարհ չի տրվելու Ադրբեջանին, վրդովված արձագանքեց. «Բա ո՞նց ա տվել, Գորիս-Կապան ճանապարհը, որ այսօր շրջանցում են ադրբեջանցիների՝ այնտեղ գտնվելու պատճառով, ո՞նց հասկանանք: Վաղը, եթե ձյուն եկավ, այլընտրանքային ճանապարհն անանցանելի է դառնալու: Շատ վատ վիճակի մեջ ենք: Օրեցօր առաջ են գալիս ադրբեջանցիները, օրեցօր դիրքեր ենք կորցնում»:

Հիշեցնենք, որ Ադրբեջանի ծրագրած եւ այս իշխանությունների հակապետական քաղաքականության հետեւանքով կորցրել ենք Գորիս-Կապան միջպետական ճանապարհը, այլեւ կասկածի տակ է դրվել Կապան համայնքի մեջ ներառված Շիկահող, Սրաշեն, Ճակատեն, Շիշկերտ, Ներքին Հանդ, Ծավ գյուղերի անվտանգությունը։ Այս գյուղերը փաստացի կտրվել են շրջկենտրոն Կապանից եւ այժմ Կապան հասնելու համար կա՛մ պետք է օգտվեն այլընտանքային եւ անանցանելի ճանապարհներից, կա՛մ Մեղրի-Քաջարան-Կապան ճանապարհից, որի երկարությունը շուրջ 150 կիլոմետր է։

Մանրամասները՝ տեսանյութում

                                                             Լիանա Սարգսյան