Աշխարհի ամենահզոր նավթային ընկերությունը կոչ է արել պատրաստվել նավթի ու գազի պատճառով գնաճին և խռովություններին

Saudi Aramco սաուդյան պետական նավթային ընկերության ղեկավար Ամին Հասան ալ Նասերը, ելույթ ունենալով Հյուսթոնում ընթացող Համաշխարհային նավթային կոնգրեսում, հորդորել է համաշխարհային առաջնորդներին՝ առաջիկա տարիներին շարունակել ներդրումները հանածո վառելիքի մեջ՝ խուսափելու համար գնաճից և սոցիալական խռովությունից. հաղորդում է Times-ը:

Նրա խոսքով՝ վերջին տարիներին հանածո վառելանյութերի ոլորտում անբավարար ներդրումները սպառնում են աշխարհը կանգնեցնել գլոբալ անկայունության սպառնալիքի առջև և քաոսի մեջ գցել աշխարհը:

Ալ Նասերը նաև նշել է, որ էլեկտրաներգիային արագ անցման գաղափարը, որն այժմ դարձել է գերիշխող թեմա, կառուցված է անիրատեսական սցենարների և խորապես սխալ ենթադրությունների վրա։

Նա կոչ է արել պատրաստվել մեծ գնաճի և անկարգությունների, եթե ներդրումային քաղաքականությունը չհամապատասխանի իրականությանը: Ալ Նասերի խոսքով՝ շատերի համար անցումային շրջանում նավթի ու գազի դերի հանրային ճանաչումը տհաճ կլինի, սակայն նման քայլի հետեւանքները շատ ավելի քիչ կործանարար կլինեն։

Saudi Aramco-ի ղեկավարը նաև նշել է, որ վառելիքի գները դառնում են «անընդունելիորեն բարձր», և զրոյական արտանետումների համաշխարհային կոալիցիան սկսել է քանդվել։