ԱՄՆ-ն ամենաշատ թուրքական զենք գնողն է, Ադրբեջանը երկրորդն է

2021 թվականի հունվար-նոյեմբեր ամիսների արդյունքներով Ադրբեջանը երկրորդ տեղն է զբաղեցնում թուրքական զենքի գնման հարցում. հաղորդում է թուրքական «Անադոլու» գործակալությունը։

«Թուրքիայի առևտրի նախարարության և Թուրք արտահանողների ասամբլեայի տվյալներով՝ հունվար-նոյեմբերին Թուրքիայից պաշտպանական և ավիացիոն արտադրանքի արտահանումը, անցյալ տարվա նույն ժամանակահատվածի համեմատ, աճել է 39,7%-ով՝ մինչև 2 մլրդ 739,974 մլն դոլար։ 2021 թվականի հունվար-նոյեմբերին հիմնական գնորդը եղել է ԱՄՆ-ը՝ 1 մլրդ 32,615 մլն դոլար (50,2 տոկոս աճ)»,- նշում է գործակալությունը։

Ադրբեջանը երկրորդ տեղում է. հունվար-նոյեմբերին Ադրբեջանը Թուրքիայից 192,126 մլն դոլարի ռազմական արտադրանք է գնել, ինչը 24,8%-ով պակաս է` նախորդ տարվա համեմատ։

Հաջորդում են Քաթարը՝ 180,544 մլն դոլար, Արաբական Միացյալ Էմիրությունները՝ 161,373 մլն դոլար, և Գերմանիան՝ 142,816 մլն դոլար։