Թուրքական դատախազությունը Ստամբուլում հայկական եկեղեցու վրա պարած թուրքերի համար 1 տարի ազատազրկում է պահանջել

Ստամբուլի Քադըքյոյ թաղամասում գտնվող Սբ Թագավոր հայկական եկեղեցու պատերի վրա երաժշտության տակ պարած 3 թուրք քաղաքացու վերաբերյալ դատական գործ է բացվել` «ժողովրդի մի մասի կրոնական արժեքները ոտնահարելու» մեղադրանքով: Դատախազությունը պահանջել է 1 տարվա ազատազրկում յուրաքանչյուրի համար։

Ստամբուլի «Անադոլու» հանրապետական դատախազության պատրաստած զեկույցում նշվում է, որ հուլիսի 12-ին` գիշերը 01։30-ին, Քադըքյոյի Սբ Թագավոր հայկական եկեղեցու վրա պարել են Օզանջան Յըլմազը, Օմեր Ֆարուք Արմանը և Յունուս Էմրե Ուզունը։

Հիշեցնենք, որ խաչի առջև պարող տղամարդկանց տեսանյութը տեղադրվել էր  սոցիալական ցանցերում հուլիսի 12-ին: Ստամբուլի վարչակազմը հայտարարել էր միջադեպի մասնակիցներին կալանավորելու մասին, նրանց հանդեպ ընտրվել էր խափանման միջոց՝ տնային կալանքի տեսքով:

«Ես համարում եմ, որ Քադըքյոյի եկեղեցում ցուցաբերված անհարգալից վերաբերմունքը (դավանանքի հանդեպ) սադրանք է՝ ուղղված մեր միասնության դեմ»,- ասել էր Էրդողանը՝ դատապարտելով կատարվածը։