Մենք ունենք ճշգրիտ տեղեկատվություն. Իրանի ԱԳՆ խոսնակը՝ Ադրբեջանի կողմից ահաբեկչական խմբավորումների տեղափոխման մասին

Ադրբեջանն ամենաբարձր մակարդակով Իրանին խոստացել է տարածաշրջանը մաքրել ահաբեկիչներից: Այդ մասին հարցազրույցում հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն:

Անդրադառնալով իրանա-ադրբեջանական հարաբերություններին՝ Խաթիբզադեն ասել է. «Ադրբեջանի հետ մեր հարաբերությունները շատ բարեկամական են, բարի, բազմակողմանի: Երեկ մամուլի ասուլիսում ես նշեցի, որ մեր հարաբերությունները մեր հարևանների, այդ թվում՝ Ադրբեջանի հետ, անկեղծ են, և նրանց հետ հարաբերությունների բացակայությունը անբնական է: Անդրադառնալով Կովկասում տեղի ունեցող իրադարձություններին՝ մենք ընդգծեցինք հարևան երկրների իրավունքների իրացման քաղաքականության կարևորությունը: Այս համատեքստում մենք ողջունեցինք Ադրբեջանի իրավունքի իրացումը, սակայն պատերազմը ճիշտ մեթոդ չհամարեցինք՝ ընդգծելով երկխոսության անհրաժեշտությունը: Իրանն ու Ռուսաստանը աջակցել են հակամարտող երկրների միջև բանակցություններին:

Ահաբեկչական խմբավորումների՝ Ադրբեջանի տարածք տեղափոխվելու մասին տեղեկատվությունը հրապարակվել է պատերազմից ի վեր, մենք ունենք փաստաթղթեր, նույնիսկ նրանց խոսակցությունները, մենք ունենք ճշգրիտ տեղեկատվություն: Մենք ադրբեջանական կողմին ասացինք, որ դա մեզ համար անընդունելի է, նրանք մեզ ամենաբարձր մակարդակով խոստացան, որ կվերացնեն այդ մտավախությունները»:

ԱԳՆ խոսնակը հիշեցրել է Ադրբեջանի «ոչ բարեկամական» վերաբերմունքն իրանցի վարորդների նկատմամբ, որից հետո Իրանը անկեղծ բանակցություններ վարեց Ադրբեջանի հետ, որոնց Բաքուն խոստացավ, որ կփորձի լուծել հարցը:

Խաթիբզադեն, անդրադառնալով ադրբեջանցի որոշ պաշտոնյաների ոչ դիվանագիտական հայտարարություններին, ասել է.

«Մենք արձագանքեցինք այս հայտարարություններին մեր սեփական ուղիներով: Հարկ է նշել, որ տարածաշրջանում կան երրորդ խմբեր, որոնք չեն ցանկանում, որ իրանա-ադրբեջանական հարաբերությունները լինեն բարեկամական: Այդ պատճառով նրանք հրապարակում են կեղծ լուրեր, փորձում են օգտագործել երկու երկրների ժողովուրդների զգացմունքները՝ իրենց նպատակներին հասնելու համար: Իրանի և Ադրբեջանի հարաբերությունները գտնվում են լավագույն մակարդակի վրա, ևերկու երկրների պաշտոնյաների փոխայցերը շարունակվում են»: