Ռուս խաղաղապահները հումանիտար ակցիա են իրականացրել ԼՂ Մարտակերտի շրջանի Հաթերք գյուղում. ՌԴ ՊՆ

Ռուսական խաղաղապահ զորակազմի զինծառայողները բարեգործական հիմնադրամի ներկայացուցիչների հետ հումանիտար ակցիա են իրականացրել Լեռնային Ղարաբաղի Մարտակերտի շրջանի Հաթերք բնակավայրում: Այս մասին ասվում է ՌԴ ՊՆ տեղեկագրում:

Հումանիտար բեռը Ռուսաստանից Լեռնային Ղարաբաղ է տեղափոխվել ռուսական խաղաղապահ զորակազմի ուժերով: Զորակազմի մասնագետները տեղական վարչակազմերի հետ համակարգելով կազմել են կարիքավորների ցուցակներն ու օգնություն տրամադրել նրանց:

«Այսօր մենք ժամանել ենք Լեռնային Ղարաբաղի հեռավոր շրջաններից մեկը՝ Հաթերք գյուղ, որտեղ 48 տեղահանված և բազմազավակ ընտանիք է ապրում: Մենք նրանց կոշիկ և տաք հագուստ ենք բերել, որը տրամադրել է բարեգործական կազմակերպությունների ասոցիացիան: Ընտանիքի յուրաքանչյուր անդամի 3-ական զույգ կոշիկ է հատկացվելու՝ ամառային, դեմիսեզոնային և ձմեռային»,- ասել է ռուսական խաղաղապահ զորակազմի ներկայացուցիչ Դմիտրի Տուսիդին:

Գյուղում, ընդհանուր առմամբ, բնակվում է 1500 մարդ:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։