Իրանը կոչ է անում Ադրբեջանին՝ ապավինել սեփական ռեսուրսներին

Հոկտեմբերի 5-ին Իրանի արտաքին քաղաքականության ռազմավարական խորհրդի ղեկավար Քամալ Խարազին ադրբեջանցի պաշտոնյաներին խորհուրդ է տվել «մոռանալ օտարերկրյա իշխանություններից անվտանգություն գնելու պատրանքի մասին և ապավինել սեփական ժողովրդին` անվտանգությունը պահպանելու համար»: Այս մասին հայտնում է իրանական IRNA գործակալությունը:

Խարազին անխոհեմ որոշում է համարել երկիրը պաշտպանելու համար  օտար ուժերի վրա հույս դնելը՝ պնդելով, որ թշնամական պետությունների նպատակներն ու վճռականությունը կհանգեցնեն տարածաշրջանում ռազմական մրցավազքի և ոչնչացման:

«Եթե Իրանն այսօր տարածաշրջանում ունի անվիճելի ուժ, ապա դա պայմանավորված է նրա ինքնուրույնությամբ և օտար ուժերից անկախությամբ»,- ասել է նա:

Խարազին նաև ողջունել է «30 տարի առաջ օկուպացված ադրբեջանական հողերի ազատագրումը»` ասելով, որ Իրանը Ադրբեջանի նախկին նախագահ Հեյդար Ալիևին կոչ է արել օգտվել Իրանի լոգիստիկ համագործակցությունից` զինված ուժերն ամրապնդելու և «գրավյալ շրջաններն ազատագրելու համար»:

Նա նաև նշել է, որ Իսրայելը, անկասկած, հետապնդելու է չար նպատակներ և բորբոքելու է պատերազմի կրակը տարածաշրջանում: