Սասուն Խաչատրյանը նշանակվեց Հակակոռուպցիոն կոմիտեի նախագահ

Կառավարության այսօրվա նիստում որոշում կայացվեց Հատուկ քննչական ծառայության պետ Սասուն Խաչատրյանին նշանակել Հակակոռուպցիոն կոմիտեի նախագահ:

Վարչապետի աշխատակազմի ղեկավար Արայիկ Հարությունյանն ասաց, որ մրցույթում առավելագույն միավորներ է հավաքել Սասուն Խաչատրյանը:

Փոխվարչապետ Սուրեն Պապիկյանն էլ ասաց, թե այս մարմնի ստեղծումն իրենց կառավարության առաջնահերթություններից է: «Ես վստահ եմ, որ ստեղծվող մարմինն աշխատանքներն առավել արդյունավետ է դարձնելու»,- ասաց նա:

Սասուն Խաչատրյան էլ նշեց, թե կառույցը լինելու է մասնագիտացված քննչական մարմին, որն ունենալու է օպերատիվ-հետախուզական գործառույթներ:

Արդարադատության փոխնախարար Սուրեն Գրիգորյանը նշեց, որ այս մարմինը կոռուպցիոն բնույթի հանցագործությունների քննության առումով նոր որակ է ապահովելու: