Թուրքական ԱԹՍ-ն հատել է Հայաստանի սահմանը՝ երկու երկրների միջև ճգնաժամի պատճառ դառնալով. Milli Gazete

Թուրքական Milli Gazete թերթը ուշագրավ տեղեկություններ է տրամադրել վերջերս թուրքական ԱԹՍ–ի կողմից Հայաստանի սահմանը հատելու և դրանից հետո տեղի ունեցած զարգացումների վերաբերյալ։

Այսպես, ըստ ԶԼՄ–ի, Իգդիրի օդանավակայանից Թուրքիայի ԶՈՒ–ին պատկանող ԱԹՍ–ն անցել է սահմանը՝ մտնելով Հայաստանի տարածք։ Սահմանային խախտումը երկու երկրների միջև ճգնաժամի առիթ է դարձել։ Նշվում է, որ Թուրքիայում Վրաստանի դեսպանատունը բողոքի նոտա է ուղարկել Թուրքիայի ԱԳՆ, որից հետո երկու պաշտոնյա  աշխատանքից ազատվել են։ Թեև թուրքական ԶԼՄ–ն չի հաղորդում, թե ինչու է Թբիլիսիի դեսպանատունը բողոքի նոտա հղել ԱԳՆ, սակայն, ամենայն հավանականությամբ, դիվանագիտական հարաբերությունների բացակայության պայմաններում ՀՀ ԱԳՆ–ն բողոքի նոտան փոխանցել է Վրաստանի դեսպանատան միջոցով։

Նշվում է, որ դեպքը տեղի է ունեցել հուլիսի 8-ին. S-26 համարով «Բայրաքթար» տեսակի ԱԹՍ-ն ժամը 06։42-ին խախտել է Հայաստանի սահմանը։ Էրզրումում գտնվող Դադաշ ռադարային կայանը ուշ է նկատել սահմանային խախտումը, տեղեկացրել է ԱԹՍ-ն կառավարողներին, որոնք էլ այն վերադարձրել են Թուրքիա։

Նշվում է, որ Թուրքիայի ՊՆ–ն հետաքննություն է սկսել ԱԹՍ-ն ղեկավարող անձնակազմի նկատմամբ, որի անդամները հեռացվել են աշխատանքից։ Աշխատակիցները պարզաբանել են, որ 06։25-ին ԱԹՍ–ի տեսախցիկը փչացել էր, այդ իսկ պատճառով չեն նկատել սահմանը հատելը՝ մեղադրելով Էրզրումի կայանին։

Նշվում է, որ հետաքննություն է սկսվել նաև Դադաշ կայանում։