Տաջիկստանի նախագահը հանձնարարել է մոբիլիզացնել 20 հազար զորք՝ Աֆղանստանի հետ սահմանն ամրապնդելու համար

Տաջիկստանի նախագահ Էմոմալի Ռահմոնը հրամայել է մոբիլիզացնել պահեստային 20,000 զինծառայող՝ տաջիկա-աֆղանական սահմանն ուժեղացնելու համար. հաղորդում է «Ասիա-պլյուս»-ը:

Համապատասխան հանձնարարականը Ռահմոնը տվել է Անվտանգության խորհրդի արտակարգ նիստի ժամանակ՝ կապված տաջիկա-աֆղանական սահմանին իրավիճակի սրման հետ:

Հանդիպմանը մասնակցել են Անվտանգության խորհրդի մշտական անդամներ, ռազմական կառույցների և իրավապահ մարմինների ղեկավարներ: Քննարկվել է սահմանամերձ շրջաններում անվտանգության ապահովման և պետական սահմանի պաշտպանությունն ամրապնդելու ուղղությամբ միջոցառումներ ձեռնարկելու հարցը:

Հաշվի առնելով իրավիճակի սրումը Աֆղանստանի և Տաջիկստանի սահմանին՝ Ռահմոնը հանձնարարել է կոնկրետ միջոցներ ձեռնարկել սահմանամերձ շրջաններում անվտանգության ապահովման ուղղությամբ: Հանձնարարվել է ուժեղացնել սահմանների պաշտպանության կարողությունները և լրացուցիչ զորք ուղարկել համապատասխան տարածքներ:

Ռահմոնը, սահմանային ներուժի ամրապնդմանը զուգահեռ, նաև հանձնարարել է հատուկ ուշադրություն դարձնել պետական սահմանի խախտումների կանխարգելմանը, այդ թվում`անդրազգային հանցագործությունների, ահաբեկչության, ծայրահեղականության և թմրանյութերի վաճառքի կանխարգելմանը:

Երկրի ղեկավարը պաշտպանության նախարարին հանձնարարել է մոբիլիզացնել 20 000 պահեստային զինծառայողներ՝ Տաջիկստանի և Աֆղանստանի սահմանի հետագա ամրապնդման համար: