Պուտինն ու Մակրոնը քննարկել են Արցախի հարցը

Ֆրանսիական կողմի նախաձեռնությամբ` հեռախոսազրույց է տեղի ունեցել Ռուսաստանի Դաշնության նախագահ Վլադիմիր Պուտինի և Ֆրանսիայի նախագահ Էմանուել Մակրոնի միջև: Քննարկվող թեմաներից է եղել նաև Լեռնային Ղարաբաղը. հաղորդում է Կրեմլի պաշտոնական կայքը:

«Վլադիմիր Պուտինը տեղեկացրել է Լեռնային Ղարաբաղի վերաբերյալ 2020 թվականի նոյեմբերի 9-ի և 2021 թվականի հունվարի 11-ի եռակողմ համաձայնագրերի իրականացման առաջընթացի մասին: Նշվել է, որ իրավիճակը տարածաշրջանում, հիմնականում պայմանավորված ռուս խաղաղապահների ներկայությամբ, մնում է կայուն: Նախադրյալներ են ստեղծվել բնականոն տնտեսական գործունեության հաստատման, տնտեսական և տրանսպորտային կապերի ապաշրջափակման համար: Ռուսաստանի նախագահը ուշադրություն է հրավիրել ռազմական գործողություններից տուժած շրջանների բնակչության հումանիտար խնդիրների լուծման գործում եվրոպացի գործընկերների, մասնավորապես` Ֆրանսիայի սերտ ներգրավման անհրաժեշտության վրա: Նրանք փոխադարձ պատրաստակամություն են հայտնել համակարգել Լեռնային Ղարաբաղի կարգավորման տարբեր ասպեկտները, այդ թվում՝ ԵԱՀԿ Մինսկի խմբի միջոցով»,- ասվում է Կրեմլի հայտարարության մեջ։