ԱՄՆ-ը չպետք է սպասի Ս-400-ի կամ Ֆ-35-ի հարցում Թուրքիայից «նոր քայլերի». Էրդողան

Թուրքիայի նախագահ Ռեջեփ Թայիփ Էրդողանը հունիսի 17-ին լրատվամիջոցների ներկայացուցիչների հետ զրույցում ասել է, որ ամերիկացի գործընկեր Ջո Բայդենի հետ հանդիպման ժամանակ նախազգուշացրել է, որ Ռուսաստանից գնված Ս-400 զենիթահրթիռային համակարգերի հարցում Անկարայի դիրքորոշման փոփոխություն չի լինի. հայտնում է Reuters-ը:

Երկուշաբթի Ջո Բայդենը և Ռեջեփ Թայիփ Էրդողանը անձնական բանակցություններից հետո դրական արդյունքների են հանգել, թեև ՆԱՏՕ-ի դաշնակիցները չեն հայտարարել երկկողմ վեճերում, այդ թվում`Ս-400-ի, Սիրիայի և այլ հարցերում լուրջ առաջընթացի մասին. նշում է բրիտանական գործակալությունը: Ըստ Էրդողանի՝ Բայդենի հետ բանակցությունների ընթացքում նա ասել է, որ Անկարան մտադիր չէ փոխել իր դիրքորոշումը հինգերորդ սերնդի Ֆ-35 ինքնաթիռների ծրագրի կամ Ս-400 հակաօդային պաշտպանության համակարգի հարցում:

«Ես ամերիկացի առաջնորդին ասել եմ, որ Վաշինգտոնը չպետք է այլ քայլեր ակնկալի Թուրքիայից այս հարցում, քանի որ Թուրքիան կատարել է իր բոլոր պարտավորությունները Ֆ-35-ի հարցում», - շեշտել է թուրք նախագահը: