Ադրբեջանը նշել է, թե որ դեպքում Հայաստանի հետ հաշտության պայմանագիր կկնքի

Ադրբեջանի արտաքին գործերի նախարար Ջեյհուն Բայրամովը հնարավոր է համարում Հայաստանի հետ խաղաղության պայմանագրի կնքումը՝ ինքնիշխանության և սահմանների անձեռնմխելիության փոխադարձ ճանաչման պայմաններով:

Բայրամովն այս կարծիքը հայտնել է երեքշաբթի՝ ելույթ ունենալով Վիեննայում ԵԱՀԿ Մշտական խորհրդի հատուկ նիստում. հայտնում է Ադրբեջանի ԱԳՆ մամուլի ծառայությունը:

Արտաքին գործերի նախարարի խոսքով՝ Ղարաբաղի «ազատագրումը» պայմաններ է ստեղծում Ադրբեջանի և Հայաստանի միջև հարաբերությունների կարգավորման համար:

Ադրբեջանի արտաքին գործերի նախարարությունը նշում է, որ Խորհրդի նիստում ընդգծվել է, որ տարածաշրջանում տրանսպորտային և տնտեսական հաղորդակցուղիների ապաշրջափակումն առանձնահատուկ նշանակություն ունի:

Հանդիպման մասնակիցները շեշտել են հայ-ադրբեջանական սահմանին առկա լարվածությունը բանակցությունների միջոցով լուծելու անհրաժեշտությունը: