Արմեն Գեւորգյանի նկատմամբ խափանման միջոց է ընտրվել ստորագրությունը չհեռանալու մասին. պաշտպան

Հայաստանի նախկին փոխվարչապետ չի ընդունում առաջադրված մեղադրանքը եւ հրաժարվել է ցուցմունք տալ ու պատասխանել որեւէ հարցի՝ որակելով մեղադրանքը քաղաքական եւ ակնհայտ ապօրինի։ Այս մասին Ֆեյսբուքի իր էջում տեղեկացրել է Արմեն Գեւորգյանի պաշտպան Էրիկ Ալեքսանյանը։

Նա, մասնավորապես, նշել է.

«Քիչ առաջ դուրս եկանք ՀՀ հատուկ քննչական ծառայությունից։ Պարոն Արմեն Գեւորգյանը չի ընդունել իրեն առաջադրված մեղադրանքը եւ հրաժարվել է ցուցմունք տալ եւ պատասխանել որեւէ հարցի՝ որակելով մեղադրանքը քաղաքական եւ ակնհայտ ապօրինի։

Վերջինիս նկատմամբ որպես խափանման միջոց ընտրվել է ստորգարություն չհեռանալու մասին։ Արմեն Գեւորգյանը սկզբունքային գտնվելով իր դիրքորոշմանը որեւէ դատավարական փաստաթղթի չի ծանոթացել եւ ոչ մի որոշում, արձանագրություն չի ստորագրել։ Իսկ ինչ վերաբերում է վարույթի ընթացքում պատշաճ վարքագծի դրսեւորմանը, ապա պաշտպանական կողմը հայտարարել է, որ Արմեն Գեւորգյանը այսօր երկու անգամ վարույթն իրականացնող մարմնի կանչով պատշաճ ներկայացել է եւ որեւէ խուսափողական գործողություններ չի կատարել եւ չի պատրաստվում կատարել։ Ավելին՝ վերջինս պատրաստվում է մնալ ՀՀ-ում եւ իր ամբողջ ներուժը դնել հայ ազգի արժանապատվությունը բարձր պահելու եւ կատարելու հնարավորինն ու անհնարը, որպեսզի յուրաքանչյուր Հայորդի հպարտանա իր ազգի համար»։

Տես նաև՝ ՏԵՍԱՆՅՈՒԹ․ Գիշերը չեմ կարողացել հանգիստ քնել կադրերից՝ ինչպես են վազում մեր զինվորականների հետևից․ Արմեն Գևորգյան:

Տես նաև՝ Արմեն Գևորգյանին մեղադրանք է առաջադրվել շուրջ 5 միլիարդ ՀՀ դրամի` հանցավոր ճանապարհով ստացված եկամուտներն օրինականացնելու համար․ ՀՔԾ:

Տես նաև՝ Արմեն Գևորգյանը այսօր հարվիրվել է ՀՔԾ հարցաքննության: