Համահայաստանյան երկօրյա սեմինար՝ ՀՅԴ ՀՊՄ վարիչների համար

ՀՅԴ Պռոշյանի «Դրո Կանայան» կենտրոնում մայիսի 1-2-ը ՀՅԴ Հայաստանի պատանեկան միությունը իրականացրեց համահայաստանյան երկօրյա սեմինար: Ծրագրին մասնակցել է պատանիների 25 վարիչ՝ Երևանից և ՀՀ մի շարք մարզերից:

Հայաստանում հիմնադրման օրվանից կարևորելով պատանիների շրջանում ինչպես բազմակողմանի գիտելիքների ամրապնդումը, այնպես էլ հայրենաճանաչության մակարդակի բարձրացումն ու հայրենասիրական դաստիարակությունը՝ ՀՅԴ ՀՊՄ-ն իրականացվող բազմապիսի ծրագրերում մշտապես կարևոր տեղ ու դեր է հատկացրել ամառային ճամբարներին, որոնց տարիների ընթացքում մասնակցել են բազմահազար պատանիներ՝ Երևանից և ՀՀ մարզերից:

Ընթացիկ սեմինարի նպատակն էր, սպասվող ամառային ճամբարներին ընդառաջ, վարիչների միջև փորձի փոխանակմանը նպաստելը: Երկօրյա սեմինարի ժամանակ վարիչներն ստացան նաև նոր գիտելիքներ և կատարելագործեցին իրենց մանկավարժական հմտությունները, որոնք հնարավորություն կտան աշխատելու պատանիների հետ լավագույն մոտեցումներով և արդյունավետորեն:

Ծրագրի ավարտին սեմինարի մազնակիցներն այցելեցին նաև Պռոշյանի Զորաց պանթեոն, որտեղ ծաղիկներ խոնարհեցին Արցախի պաշտպանության համար նահատակված հայորդիների շիրիմներին՝ խոնարհվելով նրանց հիշատակի առջև: