Ադրբեջանում գտնվող հայ գերիները տեսահաղորդագրություն են փոխանցել իրենց ընտանիքներին

44-օրյա պատերազմի հետեւանքով Ադրբեջանում գերեվարված անձինք Կարմիր խաչի միջազգային կոմիտեի միջոցով տեսահաղորդագրություն են փոխանցել իրենց ընտանիքներին:

Հարազատների հետ կապի այս միջոցն առաջին անգամ է գործարկվել: Ադրբեջանում պահվող հայերին հնարավորություն է ընձեռվել նաեւ հեռախոսով կապ հաստատել հարազատների հետ:

Հայաստանում Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին հայտնել է, որ հարազատների հետ կապ հաստատելու հնարավորություն է տրվել այն անձանց, որոնց գերության փաստն Ադրբեջանը հաստատել է, ու որոնց Կարմիր խաչի Բաքվի գրասենյակից պարբերաբար այցելում են:

Զառա Ամատունին հույս է հայտնել, որ այս ձեւաչափը կրկին կարողանալու են կիրառել, քանի դեռ մարդիկ անազատության մեջ են: Թե քանի գերի է տեսահաղորդագրություն փոխանցել, կառույցից պարզել չի հաջողվել: